У шэрагу артыкулаў Крымінальнага кодэкса плануецца ўвесці альтэрнатыўнае пазбаўленню волі пакаранне. Пра гэта паведаміў старшыня Вярхоўнага суда Валянцін Сукала, піша БЕЛТА.
Валянцін Сукала нагадаў, што летась была прынятая канцэпцыя прававой палітыкі Беларусі, у якой ужо адзначаўся пэўны дысбаланс нормаў крымінальнага заканадаўства. «Для ліквідацыі такога дысбалансу Вярхоўны суд прааналізаваў некаторыя санкцыі злачынстваў за менш цяжкія і негвалтоўныя злачынствы. Мы лічым, што гэтыя санкцыі маюць патрэбу ў карэктаванні. У першую чаргу з тым, каб у іх увесці альтэрнатыўныя пазбаўленню волі віды пакарання», — сказаў ён.
Паводле яго словаў, пазбаўленне волі сярод 10 відаў крымінальнага пакарання займае 7-е месца па ступені цяжкасці. «Калі ў санкцыях артыкулы за менш цяжкія і негвалтоўныя злачынствы няма нічога, акрамя пазбаўлення волі, вядома, судам вельмі складана выконваць такія неабходныя прынцыпы прызначэння пакарання, як сувымернасць, індывідуальнасць і справядлівасць, — растлумачыў старшыня ВС. — Каб палегчыць працу судоў, ВС прапанаваў адкарэктаваць гэтыя санкцыі, прадугледзець у іх абавязковыя альтэрнатыўныя пазбаўленню волі віды пакарання. Гэта сур’ёзна палегчыць задачу судоў па вызначэнні сапраўды справядлівага пакарання».
З такім падыходам пагадзіліся ўсе ўдзельнікі нарады ў Лукашэнкі. Найбліжэйшым часам будзе створаная спецыяльная рабочая група, якая зоймецца пераглядам санкцый шэрагу артыкулаў КК.
Нагадаем, на нарадзе з сілавікамі 11 студзеня Аляксандр Лукашэнка заявіў, што трэба «пералапачваць» Крымінальны кодэкс.
Ён паведаміў, што на яго ўказанне адміністрацыя прааналізавала шэраг артыкулаў Крымінальнага кодэкса і іх прымяненне: «Узнікаюць пытанні ў сувязі з гэтым, паглядзець на працэс, каго мы затрымліваем? Каго асуджаем? Ці адпавядаюць прызначаныя меры пакарання цяжкасці злачынстваў і той небяспецы, якую ўяўляюць гэтыя людзі для грамадства?»
«Нам патрэбная будзе вельмі вялікая праца. Трэба пералапачваць Крымінальны, можа, нават і іншыя кодэксы. Тым больш сітуацыя ў краіне характарызуецца нармальна ў плане правапарушэнняў», — дадаў Лукашэнка.