Нільскага кракадзіла з мянушкай Дандзі (таксама вядомага як Лёня) з другога разу прадалі з аўкцыёну. За яго змагаліся два ўдзельнікі.
Пачатковая цана кракадзіла складала 1800 рублёў. За час таргоў кошт Лёні вырас у два разы. У выніку лот адышоў новаму ўладальніку за 4050 рублёў.
Як піша Tochka.by, новым гаспадаром кракадзіла стала мінскае ТАА «Золотой Фараон», якое займаецца арганізацыяй азартных гульняў.
Нагадаем, кракадзілу 13 гадоў. Ён жыў у мінскім заапарку. Папярэднім уладальнікам Лёні было ТАА «Аутсорсинг Корпорэйшн», якая кіруе сеткай рэстаранаў Doner King.
Першы аўкцыён па продажы кракадзіла не адбыўся: адзіны пакупнік не пацвердзіў заключэння ўгоды.