Прэзідэнт Літвы Гітанас Наўседа 25 сакавіка прызначыў новым міністрам нацыянальнай абароны Лаўрынаса Кашчунаса. Адпаведная заява з’явілася на сайце канцылярыі літоўскага прэзідэнта.
Кашчунас да прызначэння кіраўніком Мінабароны Літвы займаў пасаду кіраўніка Камітэта па нацыянальнай бяспецы і абароне ў Сейме.
На гэтай пасадзе ён быў вядомы крытычнымі выказваннямі што да беларусаў, якія прыязджаюць у краіну і ўжо жывуць у Літве. Так, ён заяўляў, што сярод беларускай дыяспары заўважаныя «праявы літвінізму», і крытыкаваў ахвотнікаў «прысвойваць сабе гісторыю Літвы».
Палітык таксама паслядоўна выступае за ўзмацненне жорсткасці абмежаванняў у дачыненні да грамадзян Беларусі — у розны час ён прапаноўваў забараніць мець зброю беларусам і расіянам у Літве, перастаць прымаць ад іх заявы на атрыманне літоўскага грамадзянства, падтрымліваў закрыццё пунктаў пропуску на мяжы з Беларуссю.
Кашчунас таксама выступае за часовае спыненне выдачы ВНЖ грамадзянам Беларусі і лічыць, што трэба ануляваць гуманітарныя візы, калі беларусы па іх ездзяць з Літвы ў Беларусь і назад.
Сярод яго апошніх ініцыятываў — пазбаўляць відаў на жыхарства ў Літве грамадзян Беларусі (і Расіі), калі яны рэгулярна, часцей за раз на месяц цягам года, вяртаюцца ў свае краіны. Акрамя гэтага, Кашчунас збіраецца зарэгістраваць прапанову забараніць балатавацца і галасаваць на муніцыпальных выбарах грамадзянам Беларусі і Расіі з пастаянным відам на жыхарства ў Літве.